【轮证下半Part】继续等位偷入

今朝拣咗只 $HS#HSI RP2602J.P(67696)$ ，计划等埋小时图10线先，如是穿得过先再出手。

有睇到今日个市嘅都知道， $HSI(HSI)$ 今朝落到19019点之后就回升，一回就倒升嗰只，最高弹返上19222点，刚好同日线图中轴一样，而呢口价亦都叫做踩过入熊证第一层街货19200至19299点。将所有恒指熊证拆开嚟睇嘅话，暂时未有任何街货有损伤，因为目前有街货而最贴价嘅熊证，收回价见19250点，同上半场高位只系争28点，如果到依家都仲揸住喺手嘅话，一系心脏异常强大，一系就成个朝早都开紧会，根本就无睇到个市。

至于小时图条10线，系有穿过但已经变成下影线，指数摆位亦无低过10线以下，变相(67696)出唔到场。而小时图上见10小时线反过来变成指数嘅支持线，将恒指一下子推高至过埋150线，虽然上半场结束时见指数都只系得条上影线留喺150线之上，不过，如果下半场指数仍然靠住呢条10小时线的话，怕且恒指随时再挑战多次日线图20天线，唔止要高过佢，至少，要比㖊日收市价高4点，即见19230先至可以摆脱埋出「平顶」嘅可能。

嚟到下半场开市，第一件事系𥄫住五分钟图上嘅100线，事关呢条线为今朝指数提供支持，如果连佢都无埋嘅话，作战室随时开出极短线淡仓。

再睇返小时图，午后见指数终于都失守10线，而目前保历加通道仍然保持横行中。换言之暂时可以借150小时线嘅阻力向下博推返指数落中轴位。要预咗下半场步速会比上半场为低。万事俱备，只欠五分钟条保历加底线啫，佢唔向下嘅话，咁指数同Slow STC(14,3)随时出触底，将指数推返上去，一系等多次五分钟图Slow STC(14,3)上返超买再出当行一趟Swing，一系直接等收市。

作者阿珊，任财经/投资版传媒人十几年，《钟摆战略赢港股》、《轮证基础笔记》及《傻宝不懂的技术分析》系列作者。用技术分析专心玩轮证，唔贪心，努力赚取我家肥猫罐罐。