【轮证下半Part】指数摆返上近熊证街货层

上半场无拣到货，事关喺小时图上见 $HSI(HSI)$ 行出「三角形」物体，同时保历加通道口收窄。不过10点打后情况就有所不同，小时图上见到保历加通道口停止收窄嘅同时，指数亦上破「三角形」。再拆翻开五分钟图见指数借10线行出「圆底」后仲要破埋颈线，仲要上到去㖊日开市个位附近，升幅扩大至逾300点，见指数企喺18800点附近横行到上半场完场为止。

本来谂住港股都系垃圾嘅，见到咁嘅情况都系停一停，谂一谂。因为睇返日线图上见指数低位确实系出现咗「早晨之星」，但问题在于㖊日嗰支阳烛(㖊日港股系升，所以系阳烛)系实心(因为高开低走，所以系实心)，咁样嘅「早晨之星」确实系要打个五折；或者佢系借埋今日Slow STC(14,3)触底啦，嗰五折或者打得多咗。

今日指数再上，假如收市时仍然keep住呢个升幅的话，按今日恒指牛熊证街货图见，指数再次重上靠近熊证街货层，而第一层熊证见19000至19099点，呢度有相当于699张期指，第二层19100至19199点就有相当于1058张期指街货。至于下方第一层嘅牛证18200至18299点都有1418张期指街货，两边都见重货，变成用距离去量度的话，都真系向上杀熊机会比较高。

睇多次日线图，10线见18901点，换言之指数如果保持上行杀熊的话，点都要先过10线先至有肉食；当然，今日见都有新熊上市，只系唔知储到有几多货出嚟啫，多嘅，个市真系唔会同你客气；唯一要考虑嘅系牛熊街货距离再次迫近啦。

作者阿珊，任财经/投资版传媒人十几年，《钟摆战略赢港股》、《轮证基础笔记》及《傻宝不懂的技术分析》系列作者。用技术分析专心玩轮证，唔贪心，努力赚取我家肥猫罐罐。