上星期五(7月7日)喺下半场开下就拣咗 $Hong Kong Exchanges and Clearing(00388)$ 嘅熊证(68282)出嚟，谂住借五分钟图Slow STC(14,3) Swing Trade一趟就收工。可惜最后Slow STC(14,3)两线都未能上到超买就已经掉头向下，策略上(68282)出唔到。唔紧要，反正亦都有讲过港交所日线图喺上个星期五低位见280.8元，同5月底嘅低位282.2元相约，形态上虽然唔系一个「圆顶」，不过两只脚仔同步都喺一个差唔多嘅水平见下影线，底线生成，再大胆沽港交所落去嘅话，都真系要过咗条底线先比较稳阵。
仲有1分钟先至完U，睇咗个牛熊证街货图先。见今日两边都未有新增街货层出现，而牛证第一层见到有唔少勇士进场，将第一层街货18200至18299点储到上过千张期指街货；另外，齐口点数嘅18000至18099点亦如预期见过千张期指街货。至于熊证方面，第一层见19000至19099点，同现价真系争十万八千里，而呢层有相当于495张期指街货，的确系比对家嘅牛证少，咁足以反映到大家博反弹嘅心态。
$HSI(HSI)$ 今日亦不负大家所托，开市升381点，开市报18747点，呢口价将指数由原先靠近牛证重货区变成迫返上靠近熊证街货层，上个星期恒指鲸吞咗逾5000张期指，假如未够饱而又要再扫街货的，怕且都未必死冲烂冲上去熊证嗰边，因为如果要将第一层嘅熊证19000至19099点全清的话，则指数最低都要上到19100点，以开市价作为起标计，即系要再升多353点，连同U盘后嘅38点升幅，即系话个市要升734点先至食到嗰495张期指街货。哈利，就算有爱但无成交同无催化剂，咁上啫？！
依家9点42分，开咗市十零分钟后见指数已经低开高走，升幅收窄至升302点，报18667点。比较在乎嘅系小时图条中轴，事关今朝指数一开市就已经开到上小时图中轴嗰位，系好尴尬，本来以为佢咁劲跳升300几点威番次比全地球人睇下，但情况就好似猫咪跳高跳唔到而撞墙向下...阴功。
既然向下，作战室都开出淡仓，博五分钟图指数见高开低走之余，顺便睇埋小时图中轴嘅阻力有几强， $HS#HSI RP2603L.P(68293)$ ，收回价440点，杠杆约有25倍左右，以小时图中轴出现阻力为持货理由，依家9点50分，五分钟图Slow STC(14,3)都开始见高位触顶向下，简单嘅用五分钟图Slow STC(14,3)Swing Trade一转都可以。
作者阿珊，任财经/投资版传媒人十几年，《钟摆战略赢港股》、《轮证基础笔记》及《傻宝不懂的技术分析》系列作者。用技术分析专心玩轮证，唔贪心，努力赚取我家肥猫罐罐。
精彩评论