【轮证下半Part】牛熊街货差距再扩阔

今朝拣咗只 $JP#HSI RC2508O.C(67829)$ ，谂住 $HSI(HSI)$ 今日点都会做返好少少挂，Set好小时图Slow STC(14,3)触底的话就出动，已经谂住跌少啲嘅情况下出牛证其实都会有赢。

点知恒指都真系咁无鬼用，喺五分钟图见指数行出「圆顶」物体都心知不妙，于是指数未踩到落到「圆顶」颈线时已经喺作战室叫好仓走咗先，转个头指数失心疯向下穿过「圆顶」颈线，将跌幅扩到犹如黄河泛滥，一发不可收拾。反手淡仓出动嘅亦见有战友做咗，多谢呢个黄河泛滥，淡仓反手十几格亨松落袋，就算扣埋朝早嘅好仓注失手，都仲有正数喺度 。

Patreon作战室实七天免费试用已经开放！详见《轮证赢家》FB/Patreon

指数喺上半场做出低位18503点，将首五层牛证街货全数收回，呢度有相当于3731张期指街货。至于18500至18599点，确实仲有3点Hp值喺度，数目上收回价18500点嘅牛证，喺市场上有12只喺度，但坦白讲同全数死亡都无乜分别，如果将呢层全数街货1242张期指加埋上去嘅话，即今日指数吞咗4973张期指落肚，好似条蛇吞咗只羊咁，几个星期都可以唔驶食嘢。

再睇埋熊证街货情况。目前最贴价熊证收回价为19050点，换言之听日返嚟睇街货的话，熊证最贴价层会落到去19000至19099点，同现价有大约逾500点距离。假设今日指数仍然保留住嗰2点Hp值的话，咁听日返嚟牛证仲见到18500至18599点，牛熊两边街货距离再次擘阔，中间差距大约500点左右，话多唔多(今日无啦啦都无近600点啦，呢个点数系可以一步到位)，话少亦都唔算少(对比之前闷到疯都发唔到嚟讲)。

如果指数仍然以早杀早享受嘅心态应市的话，喺取易舍难嘅情况下指数或会继续向下杀近牛；又同时今日指数无啦啦跌600点，心态上应该有唔少资金出嚟博反弹。姑勿论系企喺18500至18599点或18400至18499点嘅勇士，还是企喺18000至18099点嘅后缓，牛证或多或少都会储咗上去，如是者又近又肥嘅牛就会出现，再加多个条件系熊证出唔切新货，无贴价熊嘅情况之下，你话指数向边一边杀？

作者阿珊，任财经/投资版传媒人十几年，《钟摆战略赢港股》、《轮证基础笔记》及《傻宝不懂的技术分析》系列作者。用技术分析专心玩轮证，唔贪心，努力赚取我家肥猫罐罐。