㖊日拣咗只 $JP#HSI RC2512D.C(68070)$ 出嚟，喺下昼见指数于中轴有支持就选择进取出场，平均买入价为0.053元，顺便set埋以中轴位做量度线。
落场后大家都知都下半场往往比上半场行得慢，但唔紧要，方向啱就得啦，喺落场后计，指数大约用咗差不多一个钟嘅时间咬住保历加中轴慢行，去到2点半忽然跳高，将恒指一下子迫上19300点，同时将19200至19299点嘅熊证全数吞埋，嗰度都有600几张期指街货架。
由于中轴未失，所以(68070)继续在手，呢啲忽然破位出现如果你都有货的话，其实系可以爬完格仔走人。一直持货至最后10分钟，见指数高位回落返去靠近中轴水平，如常的喺收市前10分钟指数都无触及过量度线的话，望望你自己手上嗰注，如果你认为只系一杯珍奶咁大注嘅话，你可以选择过夜；反之即时走人今晚发生咩都唔关你事。
而呢度嘅作风向来都系唔过夜(纯綷个人比较钟意有觉好瞓)，以3点50分起计10分钟作为走货时间，期内(68070)高低位做过0.064元/0.062元，即平均走货价为0.063元，一计之下，呢个下午平均都爬到10格/18.87%返嚟，闷声发财...算唔算发财先？
今朝前所未有咁早弹起，事关块面出咗一挞湿疹，搽咗一个星期类固醇都未好晒，今朝诊所未开已经排定队，到诊所开咗半个钟唔够，成个诊所已经坐满晒，姑娘话依家排筹排到第40个，真系好生意过港交所(00388)。还好9点半未到已经贴完医生，仲祝我手术成功，翁医生你好Sweet呀！
恒指今早开市微跌17点，开市报19289点，呢个点数确实是无咩可以做。到恒指开市之后见佢稍稍向下，但落到五分钟图保历加通道底线后又再弹返上去，依家10点11分，指数暂时最高见过19432点，将熊证第一层街货全数收回，不过呢度相当于25张期指，少到连前菜都称唔上，而19400至19499点嘅熊则有相当于385张期指，打上嘅都有唔少，开始有肉食嘅。
至于牛证方面，今日见有一层新增街货层，最贴价见18900至18999点，虽然有新货，但系同现价都有400几点差距，虽然未至于擘到好阔，不过假如指数再向上杀熊嘅同时，下方牛证出唔切的话，咁牛熊嘅差距又会再次拉阔，同之前情况有啲似，不过系指数一味靠近牛证街货而熊证又老年咁远，令指数不停向下。如果今次街货同指数嘅摆位相反的话，咁指数见升指日可待。
作者阿珊，任财经/投资版传媒人十几年，《钟摆战略赢港股》、《轮证基础笔记》及《傻宝不懂的技术分析》系列作者。用技术分析专心玩轮证，唔贪心，努力赚取我家肥猫罐罐。
精彩评论