㖊日轻松食咗只 $JP#HSI RC2510F.C(66061)$ ，平均赚幅有12.5格或23.58%，余下嘅时间都系等收市。
依家9点13分，天文台话今日会有狂风雷暴，屋企人都关心我家肥猫会唔会好惊；但我发觉佢开始喺狂风暴雨嘅日子，由初初会暱喺台底，到依家大摇大摆喺屋企里面行嚟行去，出面有出面嘅行雷，佢有佢喺梳化亮出个肚腩仔午睡。
$HSI(HSI)$ 未完U，作战室已经差唔多人齐咁滞，未睇分钟同小时图之前，战友Jack开心share咗张图比我，留言「唔知今日破唔破到位呢.....」我再开晒啲平均线出嚟，就见到指数㖊日高位19572点同㖊日嘅250天线位置(19583点)差唔多，即系又嚟挑战牛熊分界线。
到完U后见指数微升26点，报19547点，日线图上见指数仍然靠近250天线。而每朝早都会喺作战室同战友睇埋五分钟同小时图，都留意到唔止日线图挑战250天线，连小时图嘅250小时线都同指数愈迫愈近。
至正式开市后，指数开高低走后于五分钟图上踩住50分钟线再上冲至暂时(9点41分)高位嘅19592点，呢口价的确系笃穿咗日线图条250天线(今日见19573点)，当然，最后嘅结果就只系出咗条上影线出嚟，然后指数再缩返落啦。但其实换上保历加通道的话，指数同顶线根本仲有一截距离，Slow STC(14,3)两线目前处于超买至严重超买范围，即系话指数其实系仲系上行空间，问题系有无力。(有位唔一定要上嘅)
10点未到，恒指攻到上19600点楼上，第一层熊证街货层19500至19599点重数死亡，呢层由㖊日嘅重货区变成今日嘅只有相当于3张期指嘅街货区，收唔收其实都无乜所谓，犹如等开饭时食咗一粒花生咁嘅分量。去到19600至19699点或打上情况就唔同，懒得数近几层每层都有400至600张期指街货，好似开始上菜咁。更重要嘅系依家指数企咗喺日线图250天线之上，作战室小注好仓一早开出，不过仲未可以放松，因为仲有小时图250线要过。
终于等到10点，暂时未见指数好愿咁企住喺250小时线之上，明白嘅，系有难度嘅。盖日线图企得住250天线，再加上今日见熊证街货近又多，恒指牛(66497)，收回价19200点，同现价有逾400点差距，杠杆约44.39倍够做Day Trade，但如果以小时图嚟做Trade嘅话，不如等等指数稍回落10小时线见支持后先至再追。
作者阿珊，任财经/投资版传媒人十几年，《钟摆战略赢港股》、《轮证基础笔记》及《傻宝不懂的技术分析》系列作者。用技术分析专心玩轮证，唔贪心，志在揾餐下午茶。
精彩评论